Owayengumongameli wamajaji eWestern Cape kanye nomholi woMkhonto weSizwe (MK) Party, uJohn Hlophe, uye wakhuthaza ukuqonda okuphelele uguquko yohlelo lwezomthetho lwaseNingizimu Afrika.

Ethula inkulumo ye-African Legal Professionals Association eThekwini ngoMgqibelo, uHlophe ukugcizelele ukuthi umthetho okhona njengamanje uyehluleka ukuhlanganisa amasiko, izimiso kanye nemikhuba yabantu baseNingizimu Afrika abahlukene.

Hlophe, osanda kuqokwa ngu MK Party njengomholi walo ePhalamende likazwelonke, udalule ukuthi usezingxoxweni noMnuz Jacob Zuma. Ugcizelele ukubaluleka kokuhlanganisa abantu baseNingizimu Afrika, umgomo ahlose ukuwufeza endimeni yakhe entsha njengomholi wamaqembu aphikisayo ePhalamende.

“Cha, angikufihli. Ngisanda kuba nomhlangano noBaba (umongameli Zuma). Bengilapha ukuzohlangana naye ngoba i-MK Party okwamanje ayimelwe ePhalamende ngamtshela ukuthi ngiyavuma ukuthi siye ePhalamende. Ngiyajabula ukusho, lokhu okuzayo ngoLwesibili, ngizofungiswa phakathi kwethu abangama-58 esizomela i-MK Party njengomholi wamaqembu aphikisayo ePhalamende.”

Wengeza,

“Umsebenzi wethu wukuhlanganisa abantu abamnyama. Lokho kungaba umsebenzi wami ePhalamende Likazwelonke. Umholi wethu ubevele exoxisane namanye amaqembu ezepolitiki okubalwa nomholi we-EFF uJulius Malema,”

uthe.

Iqhaza elisha likaHlophe lilandela ukuxoshwa kwakhe ngasekuqaleni konyaka. IPhalamende livotele kakhulu ukuthi akhishwe esikhundleni sokuba ngumengameli wamajaji eWestern Cape, njengoba kunamalungu angu-305 aseseka isiphakamiso kanti angu-25 kuphela aphikisana naso.

Enkulumeni yakhe uHlophe unxuse ukuthi kube nobumbano kubantu baseNingizimu Afrika, egcizelela isidingo sokubumbana kwezizwe ezahlukene ukuze kwakhelwe phezu kwesisekelo somlando wesizwe.

“Besihlala ngokuzwana. Sashada futhi sahlala ngokuzwana. AmaZulu namaXhosa ayeganiselana yingakho sinamaBhaca ezingxenyeni zaseMount Frere, Mount Ayliff nakwezinye izingxenye zezwe, nokho namuhla silwela izikhundla.

Waqhubeka wathi,

“Ngenxa yobukoloni, umlungu wafika ezosiphoqa isiko lakhe kanye nemithetho yezomthetho. Umphumela walokho, uhlelo lwethu lwezomthetho lukhombisa abelungu kanye nalokho akubeke kwaphoqa futhi kwasiphoqa. Manje sidinga ukwenza uhlelo lwethu lwezomthetho lube Afrika,”

uthe.

Ukuqokwa kukaHlophe kususe inkulumompikiswano njengoba abanye bethi akavinjwe esikhundleni sokuba yilungu lePhalamende ngenxa yokuketulwa kwakhe. Kodwa-ke, ongoti bezomthetho bathi awukho umthetho omvimbayo ukuthi athathe isikhundla sakhe esisha ePhalamende Likazwelonke.

Umhlaziyi wokhetho ozimele uMichael Atkins, uchaze ukuthi kuzodingeka kuchitshiyelwe umthethosisekelo ukuze uHlophe angabi yilungu lePhalamende.

“Ngeke kube khona umgoqo oqondile wokuthi uMnu Hlophe abe yilungu lePhalamende. Lokhu kuzodinga ukuchitshiyelwa komthethosisekelo.

“Lolu hlelo luzodinga iningi lezingxenye ezimbili kwezintathu ukuze ligunyaze isinqumo esifuze lesi. Kubonakala kungenakwenzeka ukuthi uHulumeni omusha Wobumbano Lwesizwe uzokwazi ukukuhoxisa lokho. Kuwudaba oluzimele futhi njengoba umile umthetho, asikho isizathu ngokomthethosisekelo sokuthi kungani uHlophe angabi yiLungu lePhalamende,”

Kusho u-Atkins.