UMkhonto Wesizwe (MK) Party ulungiselela ukuthumela ithimba labantu abaqavile kuMkhandlu Kazwelonke Wezifundazwe (NCOP) ekuqaleni kwaleli sonto. Leli qembu selidalule ukuthi lowo owayeyisikhulu sakwa-Eskom, uBrian Molefe, owayeyisikhulu sakwaPrasa, uLucky Montana, owayeyisikhulu sakwaTransnet, uSiyabonga Gama, nowayenguKhomishana wakwaSARS, uTom Moyane, bangabanye abaqokelwe ukuba ngamalungu amasha ku-NCOP.

UMontana ukuqinisekisile izolo ukuthi uthintwe ngu MK Party futhi yasamukela isiphakamiso sabo sokuba ngelinye lamaLungu ePhalamende.

“Ngingakuqinisekisa ukuthi ngathintwa futhi ngamukelwa,” kusho uMontana.

Ubalule nokuthi kuke kwathintwa nabanye ongoti abamnyama.

“Ngiyazi ukuthi uBrian Molefe noSiyabonga Gama nabo bathintwa nabo bavuma,” engeza.

Lesi sinyathelo sakamuva se-MK Party kubikwa ukuthi sidala ukukhathazeka ku-ANC. Ilungu eliphezulu le-ANC, eliphinde libe yingxenye yesigungu esiphezulu seqembu elibusayo, lizwakalise ukukhathazeka ngomthelela ongase ube khona.

“Uma lezi zinsizwa zifungiswa njengamalungu ephalamende kuzoba nzima ku-ANC. Lawa maqabane angabanye babantu abahlakaniphe kakhulu esabadela ngenxa yobugovu namaqembu,” usho kanje.

Uphinde waveza ukuthi izingxabano ezibhekiswe kuMolefe, Montana, noGama ezisekelwe emiphumeleni yabo kwikhomishana yokulawulwa kombuso yidlanzana zinamaphutha, uma kubhekwa ukuthi amalungu e-ANC nawo athinteka ephalamende.

“Abantu bazothi laba bafana bayathinteka kwi-State Capture Commission, kodwa namaqabane ethu nawo ayathinteka. UZizi (Kodwa) ufungiswa nje kuleli sonto ngemuva kokuvela enkantolo ngelinye isonto. Empeleni nje leyo ngxabano ayiwathinti amanzi njengoba i-ANC inamaqabane ayethinteka kodwa asesephalamende. Owethu usihlalo kazwelonke, Gwede Mantashe, naye uyathinteka kwikhomishini kaZondo kanti usephalamende ngemuva kokufungiswa kwakhe njengelungu. UZweli Mkhize, owaphoqeleka ukuthi asule esikhundleni sokuba ngungqongqoshe wezempilo ngemuva kokuthinteka odabeni lwe-digital vibes, naye usefungiswe njengelungu lePhalamende. Abantu abahlala ezindlini zamangilazi kumele bayeke ukujikijela amatshe. Kumele sikwamukele ukuthi [lowo owayengumengameli uJacob] Zuma usehlakaniphe kakhulu,” engeza.

Izikhulu zeMK bezimanqikanqika ukuqinisekisa noma ukuphika lezi zikhundla. Nokho izingxoxo ngoMolefe noMontana zenzeke engqungqutheleni yokuqala yaleli qembu eBela Bela, esifundazweni saseLimpopo, ngempelasonto.

“Ngeke siphathe inhlangano yethu ngabezindaba ngakho-ke ngeke sikuqinisekise noma sikuphike ukuthi sithumela uBrian nabo ephalamende,” kusho isikhulu esiphezulu seqembu esicele ukuthi igama laso lingadalulwa.

Yize kunjalo, ezinye izikhulu ezintathu, nazo ezingadalulwanga amagama, zikuqinisekisile ukuthi uMolefe noMontana bangase bafungiswe njengamalungu ephalamende.

“Engikwaziyo wukuthi silwamukele uhlu lwabazongenela ukhetho okumele siluthumele ku-NCOP nokuthi amagama kaBrian noLucky akhona, kodwa noma ngabe bayasamukela yini isicelo sethu angazi. Siletha izibhamu ezinkulu ephalamende ngoba siya empini ukuze sigcine sikhulule abantu bakithi,” kusho esinye sezikhulu.

Kokunye okuhlobene nalokhu, iCorruption Watch ngesonto eledlule yasihoxisa isicelo sayo sasenkantolo sokuthi uMolefe amenyezelwe njengomqondisi ongahloniphi. Le nhlangano ifake uMolefe enkantolo ngemuva kokuthi ikhomishini kaZondo iphakamise ukuthi kuqhutshekwe nophenyo ngaye. Ummeli kaMolefe, uMpho Molefe weMolaba Attorneys, uthe ikhasimende lakhe libona sengathi liyaqinisekiswa ngokuhoxiswa kwecala.

Uveze ukuthi uMolefe uhlukumezeke kakhulu kwezomnotho nasemsebenzini ngenxa yezinkulumo ezingenasisekelo nezihlambalazayo ezihlose ukucekela phansi isithunzi sakhe. ICorruption Watch ayizange izinike izizathu zokuhoxa.

UMontana yena uke waphumela obala ngemibono yakhe ngeNhloko yamaJaji uRaymond Zondo, obengusihlalo wekhomishana ye-State Capture. Usole uZondo ngokusebenzisa budedengu amandla akhe.

“Futhi kungumbono wami oqinile ukuthi imibiko yekhomishana yokuthunjwa kombuso akufanele ibhekwe nje kuphela kodwa abekwe amacala obugebengu uJustice Zondo mathupha ngokwephula kwakhe umthetho ngamabomu, ukusebenzisa kabi amandla, ukuziphatha kobugebengu kanye nokuziphatha okuyichilo. Usebenzise le khomishini ukuvikela ngempumelelo izigebengu zangempela phakathi kwethu futhi waqinisa amandla azo,” kusho uMontana.

UMontana ukuqinisekisile izolo ukuthi uwuthathile umbiko kaZondo obubuyekezwa waveza nokuthi usekulungele ukusebenzela izwe.

“Sengikulungele ukusebenzela izwe lami, engakunikeza ngo-2018 ukuthi ngizimisele ukusebenza ephalamende mahhala inqobo nje uma kuhlomula abantu bakithi,” kuchaza uMontana.

UGama, kanye nabanye ababengabaphathi bakwaTransnet, okuhlanganisa uMolefe, u-Anoj Singh, abaqondisi beRegiments u-Niven Pillay no-Litha Nyhonyha, owayeyibamba le-CFO yakwa-Transnet uGarry Pita, owayenguMgcinimafa weqembu uPhetolo Ramosebudi, umnikazi wamasheya e-Regiments Capital u-Eric Wood, isisebenzi sakhe uDaniel Roy noKuben Moodley. , ongumnikazi we-Albatime, babhekene namacala okukhwabanisa nenkohlakalo. Bonke bangaphandle ngebheyili, udaba luseNkantolo eNkulu yaseGauteng njengamanje.

Imizamo yokuthola isikhulumeli seMK uNhlamulo Ndhlela ukuthi aphawule kayiphumelelanga.